Pressan með meira áhorf en Næturvaktin

Landsmenn hafa undanfarin fimm sunnudagskvöld setið límdir fyrir framan skjáinn og fylgst með ævintýrum blaðamannsins Láru á Póstinum þar sem hún reynir að varpa ljósi á hver myrti athafnamanninn Grétar.

Áhorfendur eru greinilega tilbúnir fyrir íslenska sakamálaþætti, en samkvæmt fyrstu mælingum er Pressa að fá ívið meira áhorf en Næturvaktin. Það má búast við því að þeir séu nokkrir sem bíða spenntir eftir lokaþáttættinum á sunnudagskvöld.

Sigurjón Kjartansson, sem ásamt Óskari Jónassyni átti hugmyndina að þáttunum, er að vonum ánægður með viðtökurnar. „Það var alltaf ætlunin að gera góða og vel heppnaða þætti og það lítur út fyrir að það hafi tekist," segir Sigurjón. Mikil vinna fór í þættina, en þeir voru tvö ár í vinnslu.

Þeir sem ekki hafa náð að fylgjast með þáttunum fá tækifæri til að fylla í eyðurnar á sunnudaginn. Þá verða allir sex þættirnir sýndir í einum rykk á Stöð 2 Sirkus. Ráðlegt er að hafa nægar birgðir af poppi og kóki, en sýningarnar hefjast klukkan sjö og standa til kortér í tólf.