Stíldrottningin Ingibjörg Sólrún vekur athygli í Washington

Ingibjörg Sólrún Gísladóttir utanríkisráðherra vakti athygli framakvenna í Washingon þegar hún var þar snemma í vetur fyrir sérdeilis fallegan og litríkan klæðnað. Ríkisstarfsmaður í Washington, sem gengur undir bloggnafninu Ava, var viðstödd móttöku fyrir konur í utanríkisþjónustu í sendiherrabústað Íslands í Washington seint í október.

„Ég tók strax eftir henni því hún var í alveg frábærum fötum" segir Ava í bloggfærslu, og útskýrir svo að það sé leitun að konu í Washington sem þorir að klæða sig í eitthvað annað en einlita dragt.

Hún segir frá því að Ingibjörg Sólrún hafi haldið stutta tölu um viðleitni íslendinga til að tryggja sér sæti í öryggisráði Sameinuðu þjóðanna. Hún segir að Ingibjörg sé alvarleg kona og femínisti. Það virðist koma henni á óvart að Ingibjörg geti leyft sér að hafa stíl í því starfi sem hún sinnir og virðist sérstaklega hrifin af röndóttri kápu sem hún klæddist. „Stíll Gísladóttur virðist ekki koma niður á starfi hennar fyrir þjóð sína..... Hún leit æðislega út í þessari kápu, kvartbuxum og háum hælum. Okkur er alltaf kennt að forðast þverrendur, en hún ber þær með prýði. Förðunin var lágstemmd og smekkleg, hárið fullkomlega litað. Hún var líka með flotta gúmmí- og silfurhálsfesti." segir í færslunni.