Beðmálsblogg Ellýar á skjáinn?

Framleiðslufyrirtækið Pegasus hefur keypt sjónvarpsréttinn að bloggi Ellýar Ármanns. Snorri Þórisson, eigandi Pegasus, segir málið á algjöru frumstigi, og að þeir séu nú að undirbúa næstu skref. Þeir hafi viljað tryggja sér réttinn, en hann telur að bloggið gæti verið sniðugur grunnur fyrir sjónvarpsþátt í ætt við Sex And The City.

Ellý líst vel á tilhugsunina um að sjá sögurnar sínar kvikna til lífsins á skjánum. „Það er líka von fyrir Bloggara núna að fá eitthvað borgað" segir Ellý hlæjandi. Hún er þó hvergi hætt að blogga, en gæti þó fært sig aðeins frá „Sex and the City" línunni. „Ég gæti tekið Dexter á þetta. Látið vinkonurnar ganga um og myrða fólk. Kannski bara skrifað undir dulnefninu Elías. Þá myndu blaðamenn ekki biðja mig um að fara úr fötunum fyrir forsíðumyndir," segir Ellý, og bætir við að hún myndi þá frekar birtast með öxi á einhverri forsíðunni.

Það er fleira að gerast hjá Ellý, en síðasti Sviðsljós dálkur hennar í 24 stundum birtist á morgun. „Ég sá fram á að ég myndi ekki komast upp í sjö stafa tölu hjá Mogganum," segir Ellý um ástæðu þess að hún hættir. Hún er þó ekki búin að ákveða hvað tekur við, en stefni maður á sjö stafa tölu á launaseðlinum hljóta bankarnir að vera það sem kemur fyrst upp í hugann „Kannski að ég hringi bara í Hreiðar. Hann var með mér í bekk í Versló," segir Ellý hlæjandi að lokum.