Ekki hrifinn af skæruliðaaðgerðum

Ég er í sjálfu sér ekki hrifinn af svona skæruliðaaðgerðum, veit ekki hverju þær skila", segir Skjöldur Sigurjónsson veitingamaður á Ölstofunni, en hún var einn fjölda staða þar sem kampakátir reykingamenn fíruðu upp í gær - innanhúss.

Skjöldur segist leiðastur yfir því að hann og meðeigandi hans, Kormákur Geirharðsson, hafi ítrekað bent á að svona gæti farið fyrir reykingabanninu. „Það þarf að klára að vinna svona dót. Þú hendir ekki barar á banni án þess að gera meira"

„Það þarf ekki að ríkja stríðsástand. Það er vel hægt að vinna þetta í sátt og samlyndi" segir Skjöldur. Hann bendir á að með reykklefa eða öðru fyrirkomulagi sé vel sé hægt að koma því við að þeir sem vilji reykja geri það innanhúss án þess að starfsfólk eða aðrir gestir þurfi að anda að sér reyk. Hann vonast til að atvikið í gær verði til að menn setjist niður og ræði málin.

„Það vill enginn vera í skæruliðastarfsemi, veitingamenn eru sem betur fer heiðarlegt fólk og við reynum að vinna eftir laganna ramma" segir Skjöldur.