Britney lögð inn - hefur ekki sofið í fimm daga

Britney Spears var tímabundið svipt sjálfræði í nótt og flutt á sjúkrahús, eftir að geðlæknir úrskurðaði að hún væri hættuleg sjálfum sér og öðrum. Samkvæmt heimildum TMZ fannst geðlækninum andlegt ástand Britney hafa farið hríðversnandi undanfarna daga. Hún mun vera í miklu maníukasti, og hefur ekki sofið frá því á laugardag.

Í gær og nótt loguðu slúðurmiðlar vestanhafs af sögum um að Britney hefði reynt að fremja sjálfsmorð, og verið flutt í snatri á sjúkrahús. Svo mun þó ekki vera. Geðlæknirinn var kallaður að heimili hennar, og mun sú heimsókn hafa verið skipulögð með nokkurra daga fyrirvara. Þegar hann sagði henni að hún væri á leið á sjúkrahús var hún róleg og spurði af hverju, hvort það væri eitthvað að. Hún fór svo og hellti sér upp á kakó á meðan hún beið eftir sjúkrabílnum.

Britney er lögð inn í þrjá daga í fyrstu, en ekki er hægt að neyða hana til að taka lyf á þeim tíma. Fáist hún ekki til að taka lyfin hyggst geðlæknirinn fara fram á að henni verði haldið inni í tvær vikur í viðbót, og má þá skikka hana til að taka lyf.