Óli Geir fær hálfa milljón í skaðabætur frá fegðurðarsamkeppni Íslands

Arnar Laufdal og Fegurðarsamkeppni Íslands voru í Héraðsdómi Reykjavíkur í dag dæmd til þess að greiða Ólafi Geir Jónssyni fyrrum hr. Ísland hálfa milljón króna í miskabætur, vegna ólögmætrar sviptingar titilsins hr. Ísland 2005.

Dóminum þótti sýnt að Ólafur hafi verið sviptur titlinum hr. Íslands 2005 á ólögmætan hátt. Sviptingin hafi auk þess verið meiðandi fyrir Ólaf. Taldi dómurinn sýnt að í sviptingunni og hvernig að henni hafi verið staðið, og þar meðal annars vísað til fjölmiðlaumfjöllunnar, hafi falist meingerð gegn persónu Ólafs sem Arnar og fegurðgarsamkeppnin beri bótaábyrgð á. Dómurinn féllst því á kröfu Ólafs um miskabætur og þær ákveðnar hæfilegar kr. 500 þúsund.

Stefndu voru auk þess dæmd til þess að greiða málskostnað kr. 679.675 til ríkissjóðs.

Í fréttatilkynningu frá lögmanni Óla, Vilhjálmi Bergs, segir að Óli Geir sé ánægður með niðurstöðuna enda hafi sviptingin verið óréttmæt og meiðandi fyrir sig.

"Einkum hafi fullyrðingar sem fram komu í fréttatilkynningum sem forsvarsmenn fegurðarsamkeppninnar sendu til fjölmiðla verið afar meiðandi, enda ósannar eins og dómurinn hafi nú staðfest," segir í tilkynningu.