Gáfumenni og rokkarar á listum stúdentafylkinganna

Barátta Röskvu og Vöku um meirihluta í stúdentaráði er farin á fullt skrið. Athygli vekur að báðar fylkingar hafa lagt mikið kapp á að fá virðulega kandídata á listann. Röskva hefur fengið til liðs við sig Davíð Þór Jónsson gáfumenni og guðfræðinema á lista fyrir háskólaráð. Frosti í Mínus vermir svo fjórða sætið á lista Vöku.

Davíð Þór Jónsson segir að honum hafi verið boðið heiðurssæti á lista Röskvu og ekki séð ástæðu til þess að afþakka þann heiður. „Þegar ég var síðast í háskólanum, fyrir 15 árum, tók ég þátt í starfi Röskvu. Þegar ég settist svo aftur á skólabekk í haust þá var mér boðið heiðurssæti. Ég er þó ekki að fara að hella mér í stúdentapólitíkina heldur er ég meira upp á punt, móralskur stuðningur frekar en að vera í forsvari fyrir listann."

Dagný Ósk Aradóttir, formaður stúdentaráðs og fulltrúi Röskvu, segir að barátta sinnar fylkingar gangi vel. „Við leggjum auðvitað áherslu á jafnrétti til náms og erum þar af leiðandi gegn skólagjöldum og viljum jafnt aðgengi að skóla," segir Dagný. Hún segir auk þess að stúdentaráð leggi áherslu á byggingu nýrra stúdentaíbúða en treglega gangi í þeim efnum vegna tíðra meirihlutaskipta í borginni.

Ingólfur Birgir Sigurgeirsson, sem skipar fyrsta sæti á lista Vöku fyrir stúdentaráð, er einnig ánægður með baráttuna. Hann segir Vöku leggja mikla áherslu á mennta- og kennslumál. „En svo leggjum við líka áherslu á opna umræðu um kjaramál stúdenta," segir Ingólfur. Hann telur að þær hækkanir sem hafi verið á grunnframfærslu stúdenta séu ekki í takti við verðlagsþróun.