LiLo drekkur vodka af stút

Þrátt fyrir að hafa verið skikkuð í meðferð, fangelsi og samfélagsþjónustu í fyrra fyrir tvö ölvunarakstursbrot virðist Lindsay Lohan ekkert feimin við að fá sér nokkra drykki þegar svo ber undir.

Það er einungis mánuður síðan að myndir náðust af Lindsay þar sem hún drakk kampavín af stút í nýársboði á Ítalíu. Hún er greinilega hrifin af því að spara uppvaskið, því um helgina sást aftur til hennar drekka af stút - í þetta skiptið vodka - á Box-barnum í New York.

Sama kvöld sáu heimildamenn New York Daily News LiLo drekka að minnsta kosti tvo vodkakokteila á öðrum bar, úr glasi þó í þetta sinn. Vinur söngkonunnar sagði við blaðið að það væri óþarfa hystería að hafa áhyggjur af þessu. Lindsay væri einfaldlega að læra að lifa við fíknir sínar og ákvæði öðru hvoru að fá sér kokteil.