Borat-bikini bannað á ruðningsleikjum

Lögregla í Nýja-Sjálandi hefur bannað karlkyns Borat aðdáendum að klæðast einkennisklæðnaði hans, efnislitlum neongrænum „sundfatnaði" á rúgbý keppnum.

Löng hefð er fyrir því að áhorfendur á Sevens ruðningsmótinu í Wellington klæðist grímubúningum, en Boratbúningarnir verða ekki þeirra á meðal á næsta móti.

Í fyrra fengu áhorfendur óáreittir að klæðast sundbolnum kynþokkafulla. Lögregla hefur nú lagt blátt bann við öllu slíku, til að vernda viðkvæma blygðunarkennd yngri áhorfenda.

Lögreglumaður í viðtali hjá New Zealand TV bað ruðningsaðdáendur um að „hafa sómatilfinningu", og sagði að enginn í sjálflýsandi g-strengs sundbol slyppi fram hjá vökulum augum öryggisvarða á leikjunum.