Angelina blæs lífi í tvíburaorðróm

Angelina Jolie gerði ekkert til að draga úr vangaveltum um að hún gangi með tvíbura þegar hún mætti á SAG verðlaunahátíðina um helgina. Stjarnan grannvaxna mætti í einhverju sem verður best líst sem tjaldi, og skálaði í vatni yfir kvöldmatnum. Þóttust reyndir menn jafnvel sjá kúlu undir herlegheitunum.

Talsmenn parsins hafa ekki viljað staðfesta orðróminn, en hafa ekki neitað honum heldur. Skötuhjúin hafa aldrei farið í grafgötur með það að þau vilji eignast fleiri börn, en þau eiga fjögur nú þegar. „Við erum að safna í fótboltalið" sagði Brad Pitt í viðtali á dögunum.

Angelina hefur einnig lýst því yfir að hún vilji jafnvægi á milli kynþátta á heimilinu. Þau eiga fyrir tvo drengi, Maddox og Pax, ættleidda frá Asíu, dótturina Zahöru sem þau ættleiddu frá Eþíópíu, og svo líffræðilegu dótturina Shiloh.

Þau eru sögð ætla að eyða páskunum í að skoða munaðarleysingjahæli víðsvegar um Afríku með það fyrir augum að ættleiða annað barn þaðan. Gangi Angelina með tvíbura eins og sagt er væru þau því einmitt búin að finna hið gullna jafnvægi, en þá ættu þau þrjú af hvoru.