Buff komst á blótið eftir allt saman

Vísir greindi frá því á föstudagskvöldið að hljómsveitin Buff hefði verið veðurteppt í Kaupmannahöfn og því hefði þurft að kalla inn aðra hljómsveit á þorrablót Stjörnunnar sem fram fór í Garðabænum. Þetta mun þó ekki vera allskostar rétt því drengirnir komust á svið við illan leik eftir að hafa brotist í gegnum veðrið.

Buff-menn sátu fastir í Köben fram eftir öllum degi að sögn umboðsmanns þeirra og því var gripið til þess ráðs að fá hljómsveitina Taktík til að hlaupa í skarðið. Taktík sló í um ellefu leytið um kvöldið en á svipuðum tíma bárust þær fregnir að Buff hefði lent heilu og höldnu í Keflavík.

Þá var allt sett á fullt við að koma drengjunum í Garðabæinn og upp á svið og með sameiginlegu átaki margra aðila náðu þeir í bæinn rétt fyrir miðnætti og kláruðu ballið með „miklum stæl" eins og þeirra er von og vísa.