Brad Pitt með kvenmannsmitti í japönskum gallabuxum

Svo virðist sem ekki sé allt satt og rétt í auglýsingum. Örstutt er síðan að öldur lægði vegna sögusagna um að David Beckham hefði notið aðstoðar uppvöðlaðs sokks í auglýsingaherferð fyrir Armani nærföt. Nú kemur það svo í ljós að meira að segja fallegasti maður í heimi sleppur ekki undan nærgöngulum pennum grafíkeranna.

Brad Pitt virðist hafa grennst um mannsþyngd í nýrri herferð fyrir japönsku gallabuxnalínuna Edwin, og er með mitti sem Beyonce gæti verið stolt af á myndunum. Pitt, sem hefur margsinnis verið kosinn kynþokkafyllsti maður heims, viðurkenndi í fyrra að eftir að hann varð fertugur ætti hann í sífellt meira basli að halda sér í formi. „Þetta er hálf glatað", sagði Pitt. „Andlitið á manni eiginlega fer og líkaminn virkar ekki eins og hann gerði". Guði sé lof fyrir Photoshop.