Kiefer Sutherland laus úr fangelsi

Leikaranum Kiefer Sutherland var sleppt úr fangelsi í Kaliforníu skömmu eftir miðnætti í nótt. Hann hafði afplánað alla 48 dagana sem hann var dæmdur til sem hann fékk fyrir fjórða ölvunarakstursbrot sitt í fyrra. Stjörnunni var stungið inn 5. desember, og eyddi afmæli sínu, jólum og áramótum í steininum.

Sutherland hafði samþykkt að lýsa sig sekan gegn því að fá stuttan dóm, til þess að fangavistin myndi ekki trufla tökur á sjónvarpsþætti hans, hinum geysivinsæla 24 Hours. Það gekk eftir, en tökurnar frestuðust nú samt, vegna verkfalls handritshöfunda.

Samkvæmt heimildamönnum New York Post var Sutherland fyrirmyndarfangi, og grínaðist til að mynda við starfsfólk fangelsins að hann myndi aldrei þvo þvott aftur, en verk hans í fangelsinu var einmitt að brjóta saman þvott.