Búið að skrifa minningargrein um Britney Spears

AP fréttastofan byrjaði að skrifa minningargrein um Britney Spears fyrir mánuði síðan. „Við erum ekkert að óska okkur þess, en ef hún deyr er það með stærri fréttum í langan tíma", sagði ritstjóri skemmtanalífsfrétta hjá AP, Jesse Washington, við Us tímaritið.

„Flestir geta verið sammála um að hún sé í hættu núna", bætir Washington við. „Að sjálfsögðu myndum við aldrei vilja að eitthvað kæmi fyrir hana, og vonum að við þurfum ekki að nota efnið fyrr en eftir fimmtíu ár. En ef eitthvað gerist, þurfum við að vera tilbúin", sagði ritstjórinn, og bætti við að AP ætti stórt safn efnis í minningargreinar, og að stöðugt væri verið að bæta við nýju fólki í safnið.

Algengt er að fréttastofur eigi tilbúið efni skyldu þekktir einstaklingar falla frá. Það á þó yfirleitt aðeins við um þá sem eru mjög aldraðir eða veikir, sjaldnast um 26 ára poppstjörnur.