Sirrý er hætt á Stöð 2

Sirrý, sjónvarpskonan ástsæla er hætt á Stöð 2, eftir tveggja ára starf. „Þetta nokkuð löng og góð törn með Örlagadaginn", segir Sirrý. Síðasti Örlagadagurinn var sýndur í byrjun janúar, en alls voru gerðir 34 þættir í tveimur seríum. Þau störf sem mér buðust í framhaldinu hjá Stöð 2 voru ekki það sem mig langar mest að starfa við svo hér skilja leiðir, í bili að minnsta kosti", segir Sirrý, en þáttur hennar, Örlagadagurinn, kláraðist í desember.

„Það sem stendur upp úr er hve gaman var að vakna Í Bítið með Heimi Karls, allt þetta góða starfsfólk hjá fyrirtækinu og að sjálfsögðu þeir mögnuðu viðmælendur sem ég kynntist í Örlagadeginum." segir Sirrý.

Sirrý mun snúa sér að öðrum verkefnum í bili. „Nú hef ég tíma til að sinna betur námskeiðahaldi og öðrum verkefnum", segir Sirrý, en hún hefur um nokkurt skeið verið með ráðgjöf í almannatengslum og þjálfað fólk í ýmsum fyritækjum í því að að tjá sig af öryggi, auk þess sem hún er nýbyrjuð að skrifa bók upp úr Örlagadeginum.

Það er ljóst að margir munu sjá á eftir Sirrý af skjánum, en er hún þá hætt í sjónvarpi? Hún segir svo ekki vera: „Ég og Hrafnhildur Gunnarsdóttir, pródúsentinn minn, erum með margar flottar hugmyndir og fleiri sjónvarpsverkefni á teikniborðinu fyrir framtíðina" segir Sirrý að lokum.