Segist ekki skrifa um handbolta á klámfenginn hátt

„Ef þú skoðar fréttir, hvort sem það er í sjónvarpi eða á netinu og berð það saman við minn fréttastíl þá er ekkert athugavert við þetta," segir Hlynur Sigmarsson umsjónarmaður vefsíðunnar handbolti.is.

Hlynur hefur skrifað mikið um handbolta í vetur en hefur verið gagnrýndur fyrir að vera nokkuð klámfenginn í spurningum sínum. „Ég er með eitthvað sem heitir hin hliðin sem er oft á tíðum ekkert svakalega áhugavert. Ég reyni að bæta það upp með því að spyrja t.d hvað sé það fyrsta sem viðmælandinn hugsar þegar orðið nakinn karlmaður kemur upp. Ef það er klám í nútímahugsun þá ætti fólk að fara að hugsa um börnin sín sem eru fjórtán ára að sofa hvert hjá öðru," segir Hlynur sem skilur ekkert í þessari gagnrýni.

Hlynur vill meina að ákveðnir menn hafi verið að herja á hann og segir hann þá hrædda við samkeppni. Nefnir hann í því samhengi forsvarsmenn síðunnar sport.is. „Ég sé ekki alveg tilganginn í því, ég held að menn ættu bara að fara að hugsa um sjálfa sig."

Hlynur er mikill áhugamaður um handbolta en hann sér einn um síðuna handbolti.is sem hann segist þurfa að borga með. Þar ráði hugsjónin ein ríkjum. „Ef einhverjum finnst þetta klámfengið þá verður það bara að vera þannig. En ef við horfum á vinsælustu fréttirnar allsstaðar þá eru þær oftar en ekki í þessum stíl. En það er í þessu eins og öllu öðru að það geta ekki allir verið ánægðir."

Hlynur segir síðuna hafa gengið ágætlega þó umferðin um hana sé mismunandi. „Ef það er ekkert umtal um þig þá er ekkert að gerast. Ég reyni bara að gera mitt besta," segir Hlynur sem varð að skjótast og undirbúa teiti fyrir stuðningsmenn landsliðsins í Þrándheimi en hann er að sjálfsögðu staddur á evrópumeistaramótinu sem hefst í dag.