Þorsteinn Guðmundsson með nýjan þátt á Skjá einum

Þorsteinn Guðmundsson grínisti með meiru snýr aftur á skjáinn í mars, þegar nýr þáttur hans fer í sýningu á Skjá einum. Þátturinn nefnist Svalbarði, og verður skemmtiþáttur í stúdíói þar sem Þorsteinn fær til sín góða gesti.

„Við viljum voða lítið segja um innihaldið" segir Kristjana Brynjólfsdóttir, dagskrárstjóri Skjásins, leyndardómsfull.

Hún lofar þó stórskemmtilegum þætti. „Þorsteinn er einn af okkar helstu grínistum, og við vildum gefa honum tækifæri til að spreyta sig aftur á skjánum", segir Kristjana.

Sindri Páll Kjartansson, sem var með Þorsteini að skemmtiþættinum Atvinnumanninum, verður hugmyndasmiður og pródúsent. Þorsteinn verður með vel valið fólk sér til aðstoðar í þættinum. Kristjana þverneitar hlæjandi að gefa neitt upp um hverjir það verða, en segir það skýrast þegar þátturinn verður kynntur.