Unnur Birna á nýjum bíl með fataskápinn í skottinu

Fegurðardrottingin og lögfræðineminn Unnur Birna Vilhjálmsdóttir, fékk sér glænýjan og glansandi fínan Hyundai i30 á dögunum. Unnur var áður á jeppling, sem hún segir hafa hentað vel í hestamennskunni, en langaði í minni bíl til almennra nota. „Ég ákvað að minnka við mig og fara á smábíl fyrir innanbæjarsnattið", segir Unnur. Hún býr til skiptis í Árbæ og Garðabæ, og þarf því ekki að hafa áhyggjur af stæðum þar, en segir stærð bílsins hins vegar koma sér vel þegar þarf að leggja honum fyrir utann Háskólann í Reykjavík, þar sem hún lærir lögfræði.

Aðspurð hvort hún sé sú manngerð sem haldi bílnum sínum ávallt óaðfinnanlega hreinum, segir Unnur að bíllinn sé með nú afar hreinn og fínn með tilheyrandi hreinlætislykt, enda splunkunýr. Það sé þó ekki víst að það ástand verði viðvarandi. „Ég bý náttúrulega á tveimur stöðum, og þá býr maður oft í bílnum líka." segir Unnur, og bætir því við að þá eigi til að myndast útibú af fataskápnum í skottinu.

Það er nóg að gera hjá Unni þessa dagana. Hún er á öðru ári í lögfræði, hefur unnið að verkefnum fyrir Icelandic glacial, auk þess sem hún vinnur við þáttinn hans Bubba. Hún segist oft ekki skilja hvernig hún fari að því að komast yfir allt sem hún kemur sér í. ,,Ég var í tökum fyrir bandið hans Bubba í haust, gat lítið mætt í tíma og hélt að ég myndi ekki hafa þetta." Álagið virðist þó ekki alslæmt. „Það hentar mér þó greinilega mjög vel að hafa brjálæðislega mikið að gera." segir Unnur, en henni hefur aldrei gengið betur í skólanum en einmitt í haust.