Stjörnurnar flykkjast til Keflavíkur

Beyonce er langt því frá eina stjarnan sem hefur gist í Keflavík á leið sinni yfir Atlantshafið. „Við erum hérna rétt við flugvöllinn og það er algengt að fræga fólkið detti hér inn út af seinkunum" segir Steinþór Jónsson hótelstjóri á Hóteli Keflavík. „Við erum náttúrulega nafli alheimsins hér á Íslandi", segir Steindór hlæjandi.

Meðal þeirra sem hafa gist á hótelinu eru Meatloaf, varnarmálaráðherra Rússlands, Dan Quayle, meðlimir Herman hermits, leikarinn Steve Riley og Al Gore, þáverandi varaforseti Bandaríkjanna. Þá þurfti John Travolta eitt sinn frá að hverfa, en hann pantaði 20 herbergi með hálfs dags fyrirvara, en hótelið var fullt. Travolta hugnaðist ekki að gista í Reykjavík, og flaug því af landi brott á einkavél sinni.

Al Gore hafði vaðið hins vegar vaðið fyrir neðan sig þegar hann var á leið austur um haf. „Gore bókaði með miklum fyrirvara" segir Steindór, en undirbúa þurfti herbergið ef eitthvað skildi gerast í heimsmálunum meðan hann dveldi þar. „Það voru tæknimenn hérna í þrjá daga og tengdu línur beint í Hvíta húsið." Steinþór segir að Gore hafi þó stoppað stutt við. ,,Svo var hann bara farinn strax aftur og skildi eftir sig forljótt pennastatíf."

Steinþór segir fræga fólkið yfirleitt vera hið almennilegasta. „Ég hef aldrei orðið var við stjörnustæla hjá þessu fólki" segir Steindór, og bætir því við að almenningur sé mun líklegri til að gera sig breiðan en stjörnurnar.

Beyonce gisti á svítu 403. Steinþór segir alveg hugsanlegt að skíra svítuna í höfuðið á söngkonunni, en ekkert hafi verið ákveðið hvort það verði gert. Þá er aftur spurning hvort ekki þyrfti að skíra önnur herbergi eftir þeim stjörnum sem í þeim hafa gist. Beyonce yrði þá við hliðina á Meatloaf, en hann gisti í svítu 401 þegar hann dvaldi á landi.