Paparassavinur Britney fær fúlgur fjár fyrir að þrífa hjá henni

Nýjasti maðurinn í lífi Britney Spears, paparassinn Adnan Ghalib, er ekki kærasti hennar, heldur sendill.

Daily Mail hefur það eftir heimildamanni sínum að Ghalib þiggi hundruðir þúsunda vikulega fyrir það að skutla poppprinsessunni á milli staða og aðstoða hana. Þar fyrir utan þrífur paparassinn heimili söngkonunnar, snattast, verslar í matinn og ver hana fyrir ágangi fyrrverandi starfsfélaga sinna þegar hún hættir sér út úr húsi.

Britney hefur varið mestum tíma sínum með Ghalib frá því skömmu áður en hún var óvænt lögð inn á sjúkrahús á dögunum. Henni mun að sögn blaðsins vera mikið í mun að missa hann ekki frá sér, og keypti meðal annars fyrir hann splunkunýjan Mercedes Benz til að snattast á.

Það dugar Ghalib þó ekki. Hann mun ætla sér að hagnast eins og hann getur á samskiptum sínum við Britney, og er meðal annars farinn að rukka slúðurblöðin um rúmar hundrað þúsund krónur fyrir að leka í þau upplýsingum um samband þeirra.