Egill Helga í sólinni með Engelbert Humperdinck

„Þá þóttist ég kenna að þarna væri kominn söngvarinn Engelbert Hupmerdinck sem var mjög vinsæll þegar ég var drengur," segir Egill Helgason á bloggsíðu sinni en hann hitti söngvarann í fríi á Barbados í vikunni.

Egill hefur verið að sóla sig á Barbados og undirbúa sig undir átök vetrarins í pólitíkinni. Hann er nú kominn heim en á síðunni sinni lýsir hann því þegar hann sá Engelbert útundan sér á sundlaugarbakkanum en áttaði sig ekki strax á því hver þetta væri.

„Ég sá að minnsta kosti einn mann biðja hann um eiginhandaráritun. Mér heyrðist hann segja að það væri fyrir mömmu sína. Hún væri huge fan.Ég fór að nota útilokunaraðferðina. Ekki var þetta Elvis, hann er dáinn. Ekki Neil Diamond, hann er minni og geðvonskulegri. Ekki Tom Jones, hann er krullhærðari," skrifar Egill sem áttaði sig síðan á því að þarna var Engilbert.

„Nokkru seinna átti ég leið framhjá sundlauginni. Engilbert leit upp. Við horfðumst í augu. Heilsuðumst."