Íslendingur selur lystisnekkju Saddams Hussein

Viðskiptahúsið hefur sett í sölu lystisnekkjum Saddams Hussein fyrir rúmlega tvo milljarða króna. Undanfarin ár hefur skipið legið í höfn í Frakklandi en það er smíðað í Danmörku árið 1981.

Viðskiptahúsið skilgreinir sig sem eignamiðlun og er í eigu forstjóra fyrirtækisins Jóhanns Magnúsar Ólafssonar.

Á heimasíðu Viðskiptahússins eru margar fallegar eignir en einnig er að finna þessa lystisnekkju sem ber heitið Ocian Breeze.

Í umsögn um snekkjuna segir meðal annars að hún státi af þyrlupalli og þar er sagður allur sá lúxus sem nokkur maður getur óskað sér.

„Þetta gæti verið farkostur fyrir óvinsæla menn, því allir gluggar eru með skotheldu gleri og það er hægt að setja upp þungar vélbyssur víðsvegar meðfram borðstokknum," segir á síðunni.

Ennfremur er talað um þrjátíu og fimm manna áhöfn sem var til taks dag og nótt, meðan Saddam var við völd. Nú er hinsvegar búið að gera starfslokasamning við áhöfnina.

Þeir sem hafa áhuga geta haft samband við skrifstofu Viðskiptahússins Skúlagötu 17, 101 Reykjavík.