Franskt forsetabarn á leiðinni

Nicolas Sarkozy og unnusta hans, Carla Bruni eiga von á barni, að sögn franskra fjölmiðla. Parið kynntist kynntist í samkvæmi 23. nóvember síðastliðinn, mánuði eftir að Sarkozy skildi við eiginkonu sína til tólf ára, Ceciliu Sarkozy.

Franska vefsíðan 20minutes.fr greindi frá því í gær að læknar í París hefðu staðfest þungun Cörlu. Blaðamaður síðunnar hafði upplýsingarnar eftir heimildamanni á Ameríska sjúkrahúsinu í Neuilly í úthverfi Parísar, þar sem Carla fór í ómskoðun í síðustu viku.

Fjörugt ástarlíf Sarkozy hefur vakið mikla athygli og lagst misvel í Frakka. Frá því hann var kjörinn fyrir tæpu ári hafa verið skrifaðar þrjár bækur og mýgrútur blaðagreina um ástarlíf hans.