Amy Winehouse orðin ljóshærð

Villingurinn Amy Winehouse hefur greinilega ákveðið að 2008 yrði ár breytinga. Hún byrjaði á hárinu.

Þegar söngkonan kom heim úr áramótafríi sínu til karabíska hafsins, þar sem hún dvaldi í villu Bryans Adams á eynni Moustique, var það eitt hennar fyrstu verka að lita svart hárið ljóst. Eða heiðgult öllu heldur. Hún lét það þó ekki nægja, því túperaða sátan á kollinum fékk að fjúka líka.

Hárið fyrirferðarmikla hefur hingað til verið jafn órjúfanlegur hluti af ímynd stjörnunnar og kolbikasvört augnmálningin og seiðandi röddin. Breytingin vakti því nokkra furðu. „Amy ákvað í byrjun vikunnar að hún vildi lýsa hárið," sagði vinur söngkonunnar. „Hún sá nýja árið sem tækifæri til nýrrar byrjunar. Að breyta ímyndinni virtist góð leið til að byrja."