Sjónvarpsmaður hyggst bjarga Luton

Sjónvarpsmaðurinn Nick Owen fer fyrir hópi fjárfesta sem hyggst kaupa enska 2. deildarliðið Luton. Félagið rambar á barmi gjaldþrots en Owen ætlar að koma til bjargar.

„Ég er virkilega bjartsýnn og fullur tilhlökkunar," sagði Owen sem hefur verið stuðningsmaður Luton síðan í æsku. Viðskiptamenn á Englandi og víðar eru í hópi hans.

Owen er sextugur og stjórnar þættinum Midlands Today á BBC. Meðal þeirra sem standa með honum í boðinu er Mick Pattinson, fyrrum leikmaður í unglingaliði Luton, sem er stjórnarformaður í fasteignafyrirtæki í Bandaríkjunum.

Luton fór í greiðslustöðvun í lok nóvember. Liðið gerði um helgina 1-1 jafntefli gegn Liverpool í ensku bikarkeppninni.