Paparassavinur Britney Spears að selja myndir af henni?

Umboðsskrifstofa Adnan Ghalib, paparassa og nýjasta vinar Britney Spears, fer þessa dagana fram á svimandi fjárhæðir fyrir einkamyndir af parinu.

Skrifstofan hefur undir höndum myndir af parinu þar sem þau spóka sig saman á svölum húss í Santa Barbara, Britney íklædd karlmannsskyrtu einni fata. Myndbandið var tekið daginn eftir að Britney var sleppt af spítala og athygli vekur að hvorki sést tangur né tetur af risavaxinni hjörð ljósmyndara sem fylgir henni í hvert fótmál. „Brit er hundelt allan sólarhringinn og samt sem áður var eina fólkið sem náði þessum myndum samstarfsfélagar kærasta hennar. Það er óvenjulegt svo ekki sé meira sagt," sagði heimildamaður Sun blaðsins.