Leit AC Milan að sóknarmanni í fullum gangi

AC Milan ætlar sér að krækja í sóknarmann í sumar en þar eru Didier Drogba hjá Chelsea og Emmanuel Adebayor hjá Arsenal ofarlega á blaði. Leonardo, stjórnarmaður hjá ítalska liðinu, staðfestir þetta.

„Það er ekkert leyndarmál að við höfum áhuga á þessum mönnum. Við bíðum eftir rétta tímanum," sagði Leonardo.

AC Milan þarf nýjan sóknarmann eftir að hafa selt Alberto Gilardino til Fiorentina og þá er Ronaldo að glíma við alvarleg meiðsli. „Það er erfitt fyrir okkur að keppa við stærstu liðin á Spáni og Englandi þar sem innkoman er meiri," sagði Leonardo.