Verður að bregðast við ef olíutunnan fer í 200 dollara

Geir H. Haarde forsætisráðherra segir að stjórnvöld verði að móta áætlun um viðbrögð ef olíuverð fari í 200 dollara á tunnu á næstu mánuðum. Það verði að fá fólk til þess að nota aðra orkugjafa en jarðefnaeldsneyti, til dæmis metan.

Þetta kom fram í fyrirspurnartíma á Alþingi í dag. Valgerður Sverrisdóttir, varaformaður Framsóknarflokksins, vakti athygi á hækkandi eldsneytisverði en tunnan af olíu er nú komin yfir 130 dollara. Hún sagði að spár gerðu ráð fyrir að hún færi yfir 150 dollara fyrir árslok og jafnvel í 200 dollara á næsta ári. Spurði hún hvort einhver vinna væri í gangi af hálfu stjórnvalda til þess að bregðast við þessu og minnti á stefnumörkun fyrri ríkisstjórnar um umhverfisvæna samgöngukosti.

Geir H. Haarde sagði þetta alvarlegt mál sem setti svip sinn á efnahagslíf í öllum löndum. Ef olíuverð færi í 200 dollara væri verulega illt í efni. Það yrði að móta áætlun um að bregðast við því.

Geir sagði það enga þýðingu hafa að hnika við gjöldum ríkisins um nokkrar krónur niður á við. Það yrði að fá fólk til þess að breyta hegðun sinni og nota aðra orkugjafa. Benti hann á að metan væri innlendur orkugjafi sem Íslendingar ættu að nýta betur og grípa þyrfti til aðgerða til að stuðla að því. Þingheimur hlyti að geta sameinast um að breyta þessu.