Málað í miðborginni

Framkvæmda- og eignasvið Reykjavíkurborgar fékk í morgun heimild til að mála illa farið hús við Bergsstaðastræti, en ítrekað hefur verið kvartað yfir ásýnd þess, sem og ástandi lóðar.

Þessi framkvæmd í dag var í tengslum við átakið „hrein borg", sem felst meðal annars í að fjarlægja veggjakrot í miðborginni. Byggingarfulltrúi, sem hefur verið í samskiptum við eigendur illa farinna bygginga og krafist úrbóta, gaf heimild til verksins.

Verktaki sem stendur í framkvæmdum á næstu lóð leit greinilega á þetta framtak sem hvatningu um góða umgengni og málaði gám sem hefur legið vel við höggi krotara.

Í dag hófst einnig vinna við að lagfæra og mála yfirgefið og illa útleikið hús við Frakkastíg, áður hljóðfærahúsið Rín. Eigendur bregðast með því við óskum og kröfum byggingafulltrúa.