Ferguson: Menn hæðast að Sepp Blatter

Sepp Blatter, forseti FIFA, á það á hættu að missa trúverðugleika sinn sem valdamesti maður í knattspyrnuheiminum. Þetta segir Sir Alex Ferguson, knattspyrnustjóri Manchester United í viðtali við tímaritið GQ.

"Ég held að orðspor Blatters sé í hættu og að málið sé komið á það stig að menn í knattspyrnuheiminum séu farnir að hæðast að honum. Ég veit ekki hvort hann er bara að verða of gamall eða hvað það er. Sjáið bara harðstjórana í Afríku," sagði Ferguson.

Hann var því næst spurður hvort hann væri að líka Blatter við Robert Mugabe, forseta Zimbabwe.

"Það væri fáránlegt. Ég er bara að segja að hann hafi gefið út frá sér nokkrar fáránlegar yfirlýsingar í valdamiklu starfi sínu og því eigi hann mjög á hættu að missa allan trúverðugleika," sagði Ferguson.

Blatter, sem er 72 ára gamall, vakti reiði Ferguson fyrr á þessu ári þegar hann lýsti því yfir að Cristiano Ronaldo leikmaður United væri þræll hjá félaginu.

"Það olli miklu fjaðrafoki þegar hann lýsti þessu yfir og það er engin furða, því hann gaf þetta út árið eftir að haldið var upp á 200 ára afmæli afnáms þrælahalds."

Ferguson gerir því skóna í þessu sama viðtali að Real Madrid hafi keypti varnarmanninn Gabriel Heinze af United í óeðlilegum tilgangi. Hann hafi verið góður vinur Cristiano Ronaldo og spænska félagið hafi viljað nota hann sem beitu til að krækja í Portúgalann.

"Ég held ekki að þeir hafi haft áhuga á Heinze í raun og veru - þó hann sé góður leikmaður. Það sem vakti fyrir þeim var að nota hann til að ná í Ronaldo," sagði Ferguson.