Top Gear kynnir í farsíma undir stýri

Mynd sem virðist sýna Jeremy Clarkson kynni Top Gear þáttanna tala í farsíma á meðan hann keyrir hefur verið afhent lögreglu.

Adam Blake og Hayley Byford segjast hafa séð Clarkson í símanum á meðan hann keyrði á 112 kílómetra hraða á sjaldgæfum 30 ára gömlum Grosser Mercedes bíl á hraðbraut í Oxfordshire.

Dagblaðið Daily Mirror segir að lögregla muni rannsaka myndina sem hún hefur birt. Talsmaður lögreglunnar sagði blaðinu að málið væri tekið mjög alvarlega og gögnum yrði aflað til að sjá hvort hægt yrði að byggja málsókn á þeim. Lögreglan segist þakklát blaðinu fyrir að afhenda myndina.

„Við trúðum ekki að við hefðum hitt á hann. Ég var vanur að horfa á hann í hverri viku í Top Gear þættinum og hann var alltaf að tala um nýju umferðarlögin. Kærastan mín sá að hann var í farsímanum. Hún greip sinn og tók mynd af honum," sagði Blake í viðtali við dagblaðið.

Blaðið fullyrðir að það hafi síðar spurt Clarkson um myndina á heimili hans. Fyrst hafi hann neitað að vera í ´bilnum, en þegar hann sá mynina hafi hann sagt; „Uuu, þetta er ekki sími." Clarkson mun hafa vísað blaðamanninum frá á þeim forsendum að hann skrifaði greinar í annað dagblað og væri ekki leyfiilegt að tala við blaðamann Daily Mirror.

Ökumenn sem tala í síma undir stýri í Bretlandi missa þrjá punkta úr ökuskírteininu og fá rúmlega átta þúsund króna sekt.