Íhuga heilagt stríð gegn Dönum og Hollendingum

Danir og Hollendingar hafa skapað sér mikla óvild í hinum íslamska heimi vegna skopmyndateikninga af spámanninum. Þær hafa farið fyrir brjóstið á trúuðum Afgönum og hafa sumir múslimar haft á orði að heilagt stríð vofi yfir.

Mótmælendur hafa komið saman í Herat, Jalalabad og víðar síðustu daga til að láta í ljós óánægju sína með skopmyndina og að blöðin hafi kosið að birta hana á ný.

Það eru þó ekki bara aðgerðir Dana sem hafa fyllt marga Afgana af heilagri vandlætingu. Hollendingar hafa einnig móðgað þá með mynd þar sem Kóraninn er gangrýndur. Því verki er einnig mótmælt án þess að myndin hafi komið fyrir sjónir almennings. Um stuttmynd er að ræða eftir hollenska þingmanninn Geert Wilders. Að sögn þeirra sem séð hafa er í myndinni talað um Kóraninn sem bók fasista. Wilder hefur áður líkt hluta Kóransins við Mein Kampf eftir Adolf Hitler.

Samkvæmt lögum í Afganistan er það alvarlegur glæpur að gagnrýna Múhameð spámann eða Kóraninn. Sá sem gerir það fyrirgerir lífi sínu.