Umsátursástand í Tíbet

Umsátursástand ríkir í borginni Lahsa eftir að óeirðir brutust út milli kínverskra öryggissveita og andstæðinga kínverskra yfirráða í Tíbet. Víða um heim hefur fólk fjölmennt fyrir utan sendiráð Kína og lýst yfir stuðningi við sjálfstæði Tíbets.

Mótmælendurnir gengu berskerksgang um borgina í gær og var kveikt í bílum og verslunum auk öllu því sem tengist yfirráðum Kínverja. Kínversk stjórnvöld hafa svarað af hörku og hefur fjölmennt herlið verið sent til borgarinnar til að halda uppi röð og reglu. Þá lokuðu stjórnvöld símasambandi við útlönd.

Kínverskir ríkisfjölmiðlar segja að tíu manns hafi látist í átökunum en útlagastjórn Tíbets, sem heldur til í Indlandi, segist hafa staðfestar fréttir fyrir því að 30 manns séu látnir en segir að sú tala sé líklega nærri hundraði.

Kínverjum er mikið í mun að viðhalda stöðugleika í héraðinu, ekki síst í aðdraganda Ólympíuleikanna í Peking í sumar. Einungis tvær vikur eru þangað til hlaupið verður með Ólympíukyndilinn í gegnum héraðið og því koma óeirðirnar á versta tíma fyrir Kínverja.

Einnig hefur slegið í brýnu milli Tíbeta sem eru hliðhollir kínverskum stjórnvöldum og þeim sem fylgja útlagastjórninni í Tíbet.