Kvennalið Arsenal næði jafntefli við Tottenham

Miðjumaðurinn Cesc Fabregas hjá Arsenal virðist ekki óttast mikið að spila við erkifjendur liðsins Tottenham í kvöld.

Breska blaðið Sun fjallar að venju mikið um grannaslaginn í dag og hefur grafið upp viðtal við Spánverjann þar sem hann tjáir sig um Tottenham.

Fabregas mun hafa látið hafa eftir sér í samtali við karlatímaritið Loaded að kvennalið Arsenal gæti staðið í Tottenham.

"Þær myndu standa sig vel - ég er viss um að þær næðu í stig."

Síðast þegar erkifjendurnir mættust var það reyndar Tottenham sem fór með 5-1 sigur í undanúrslitum deildarbikarsins í janúar. Það var fyrsti sigur Tottenham í 22 leikjum gegn grönnum sínum.

"Það var bara deildarbikarinn. Allir vita að við notum þá keppni bara sem æfingakeppni fyrir unga leikmenn," er haft eftir Arsene Wenger í Sun.