Lindsay Lohan í líkhúsinu

Leikkonan unga, Lindsay Lohan, stefnir hraðbyri í líkhúsið. Lohan, sem var dæmd til samfélagsþjónustu fyrir ölvunarakstur á síðasta ári, hefur unnið nokkra daga hjá Rauða Krossinum, en nú liggur leiðin í líkhúsið.

Líkhúsvinnan er hluti refsingarinnar, til þess að sýna þeim sem verða uppvísir að ölvunarakstri afleiðingar þess að keyra fullur. Alls mun Lohan vinna í átta klukkustundir í líkhúsinu. Hún þarf líka að vinna tvo daga á neyðarmóttöku sjúkrahúss.

Lohan var tvisvar gripin ölvuð undir stýri í fyrra. Hún hefur þegar afplánað 84 mínútur í fangelsi, gengist undir tveggja mánaða langa áfengismeðferð og sinnt samfélagsþjónustu hjá Rauða krossinum.