Saksóknari í Byrgismáli segir niðurstöðuna ásættanlega

Sigríður Friðjónsdóttir saksóknari sem sótti hið svokallaða Byrgismál fyrir ákæruvaldið segist nokkuð sátt með niðurstöðu héraðsdóms frá því á föstudag. Þá fékk Guðmundur Jónsson gjarnan kenndur við Byrgið þriggja ára fangelsisdóm. Guðmundur var dæmdur í öllum ákæruliðunum.

„Já mér sýnist það, ég á reyndar eftir að lesa þetta almennilega," segir Sigríður aðspurð hvort hún sé sátt með niðurstöðuna.

„Miðað við refsirammann í þessum brotum þá er þetta ásættanlegt. Sönnunarstaðan er þokkaleg og það er dæmt í öllum ákæruliðunum þannig að það safnast saman."

Sigríður veit ekki til þess að búið sé að áfrýja málinu en býst við að svo verði enda lögmaður Guðmundar búinn að gefa það út í fjölmiðlum. Hún segir ákæruvaldið ætla að fara fram á þyngingu refsingar líkt og gert í flest öllum tilvikum þegar mál sem þetta fer fyrir Hæstarétt.