Umdeilt buxnafrumvarp í Florida

Öldungadeild Bandaríkjaþings hefur nú til afgreiðslu lagafrumvarp þingmannsins Gary Siplin frá Orlando sem mun, verði það að lögum, banna nemendum í almenningsskólum Florida-ríkis að ganga um með buxurnar hálfa leið niður um sig sem þótt hefur tíska. Nú þegar hafa nokkrar borgir og bæir í Suðurríkjum Bandaríkjanna sett reglur til höfuðs slíkri buxnanotkun þar sem jafnvel er lögð fangelsisrefsing við ítrekuðum brotum en Florida yrði fyrsta ríkið til að banna hana með lögum.

Fylgismenn frumvarpsins segja skólayfirvöld gjarna slá slöku við í að framfylgja reglum um klæðaburð og oft hafi foreldrar litla hugmynd um hverju börn klæðist í skólum. Gagnrýnendur halda því hins vegar fram að lögin séu óþörf og klæðaburður skólabarna ætti að vera á ábyrgð kennsluyfirvalda og foreldra - ekki barnanna sjálfra. Gary Siplin, flutningsmaður frumvarpsins, segir að rekja megi táknfræði þessarar buxnatísku til fangelsa en innan veggja þeirra hafi það verið túlkað sem beiðni um kynlíf að bera buxurnar lágt. Síðar hafi rapptónlistarmenn tekið fyrirbærið upp á arma sína og breitt það út. „Tilgangurinn er að benda nemendum á að þessi tíska er ekki sprottin úr góðum jarðvegi," sagði Siplin sem telur að rétt bornar buxur hjálpi nemendunum síðar meir til að ljúka háskólagráðu og fá vinnu. Reuters greindi frá.