Þotuliðið fagnaði nýju ári á Hótel Borg

Sigurður Einarsson, stjórnarformaður Kaupþings, Svafa Grönfeld rektor Háskólans í Reykjavík og Sindri Sindrason stjórnarfomaður Eimskips voru meðal gesta á nýársfagnaði á Hótel Borg.

Það voru Stuðmaðurinn Jakob Frímann Magnússon, Róbert Wessman, forstjóri Actavis og fleiri athafnamenn sem stóðu að fagnaðinum. „Þetta var mjög skemmtilegt. Þó maturinn á Hótel Borg sé yfirleitt mjög góður held ég að hann hafi aldrei verið betri en einmitt þetta kvöld," sagði Jakob Frímann í samtali við Vísi, en boðið var upp á glæsilegan sjö rétta matseðil.

Jakob segir að nýársfagnaðurinn hafi verið skipulagður með einungis þriggja daga fyrirvara og skemmtidagskrá verið mjög óformleg, en þeir helstu sem tróðu upp voru Freyr Eyjólfsson, gleðigjafinn Bogomil Font og Kalypsokvintett Flís.