Bubbi sáttur við sjálfan sig í Skaupinu

„Það er nú bara einn leikari sem er með licence to kill á Bubba og það er Hjálmar Hjálmarsson," segir Bubbi Morthens um frammistöðu Jóns Gnarr í Áramótaskaupinu.

Jón Gnarr fór þar í líki Bubba og kynnti nýjan sjónvarpsþátt sem bar heitið, Bíllinn hans Bubba. „Ég er mikill aðdáandi Jóns og þykir vænt um hann. Ég held að hann hafi ekki verið að reyna að kópera mig en ég var ánægður með þetta," segir Bubbi sem er einnig afar stoltur yfir því að hafa verið nánast samfleytt í Skaupinu frá árinu 1980. Geri aðrir betur.

Bubbi var mjög ánægður með Áramótaskaupið í heild sinni og þá sérstaklega grínið á sjálfan sig. „Þetta var aðeins þróaðra en áður."

Það liggur vel á Bubba á nýju ári en mikið er framundan hjá kappanum sem hefur sett sér áramótaheit eins og aðrir landsmenn. „Það er kannski að þeir í Siðmennt verði ánægðir með það. En ég ætla mér að tala meira við Guð á nýju ári,"segir Bubbi og bætir því við að hann þurfi ekki að fara í kirkju til þess.

Uppselt er á tóleika Bubba með stórsveit Reykjavíkur á laugardaginn en hann segir líklega smugu að næla sér í miða á tónleikana sem fara fram á föstudaginn. „Ég er einmitt á leið á æfingu með stórsveitinni, þetta er ferlega gaman og verður mjög kúl. Ég er samt algjörlega að hoppa út í djúpu laugina. Ég veit hinsvegar ekkert hvort það sé vatn í henni."