Lindsay nær í þrjá gæja á sólarhring

Lindsay Lohan er kannski hætt að drekka, en hún er alls ekkert hætt að skemmta sér. Leikkonan var viðstödd kvikmyndahátíð í Capri á Ítalíu á dögunum, þar sem hún náði að kela við þrjá ítalska karlmenn á einum sólarhring.

Fyrstur var þjónninn Alessandro Di Nunzio. Að sögn Daily Mail hittist parið á frumsýningu sem Lindsay mætti á með vinkonu sinni Hayden Panettiere. Lilo var fljót að losa sig við vinkonuna, og fór með drenginn á veitingastað fyrir smá nart og kelerí.

Morguninn eftir var þjónninn góði gleymdur, en miðaldra leikari að nafni Eduardo Costa átti hug Lilo allan. Parið sást í faðmlögum á verðlaunahátíð, og þó Lindsay hafi að sögn viðstaddra hlegið að bröndurum hans var hann fljótt úr sögunni.

Þá var komið að rúsínunni í pylsuendanum, leikaranum Dario Faiella, sem var sá eini sem komst alla leið inn í hótelherbergi leikkonunnar. Þau lentu í hörkusleik á næturklúbb áður en þau héldu heim á hótel. Sá fékk að gista, og morguninn eftir náðu paparassarnir myndum af Lindsay þar sem hún strýkur bossa leikarans á svölum hótelherbergisins.

Það er kannski eins gott að ástarlífið er í lagi, því það mætti margt betur fara í vinnumálum leikkonunnar. Lesendur Moviefone vefsíðunnar kusu Lohan verstu leikkonu ársins fyrir frammistöðu hennar í myndinni ,,I know who killed me".