Þrjá mánuði fyrir að lemja kærustuna

Karlmaður var í Hæstarétti í dag dæmdur í þriggja mánaða skilorðsbundið fangelsi fyrir líkamsárás og brot gegn frjálsræði kærustu sinnar. Hann var einnig dæmdur til þess að greiða henni 400.000 krónur í miskabætur. Hann var sautján ára gamall þegar brotin voru framin sem hann játaði að hluta til. Líkamsárásin stóð yfir í langan tíma og stúlkan varð fyrir miklu áfalli vegna þess ofbeldis sem kærastinn beitti.

Atburðarrásin hófst um klukkan 20:30 þegar pilturinn ekur um götur Reykjavíkur með stúlkuna og beitir hana ofbeldi. Stúlkan nær að stökkva út úr bílnum í Hafnarstræti, en pilturinn elti hana uppi og dró hana nauðuga aftur inn í bifreiðina. Hann ók síðan með hana út að Gróttu og lauk bílferðinni við Eiðistorg.

Í framburði beggja þykir ljóst að stúlkan hafi verið grátandi og í miklu uppnámi en þeim greinir á um hvort hún hafi farið sjálfviljug aftur upp í bifreiðina eða dregin þar inn eins og hún heldur fram.

Pilturinn viðurkenndi fyrir dómi að hann hefði ekki stjórn á skapi sínu og játaði brotin sín að hluta til. Í dómnum er tekið tillit til þess hversu ungur hann var þegar brotin voru framin og er það talið honum til refismildunar að hann hafði engan sakaferil. Hinsvegar var litið til þess að líkamsárásin stóð yfir í langan tíma en það réttlætir ekki verknaðinn „að stúlkan hafi storkað honum með því að segjas hafa verið honum ótrú."

Hann var einnig fundinn sekur um líflátshótanir.