Toppliðin unnu sína leiki

Ellefta umferð í Landsbankadeild kvenna var leikin í kvöld. Valur hefur enn þriggja stiga forystu á KR en Valsstúlkur unnu 4-1 útisigur gegn HK/Víkingi í kvöld.

Staðan var markalaus í hálfleik en Valur komst síðan yfir á 54. mínútu. Tveimur mínútum síðar jafnaði Þórhildur Stefánsdóttir. En Valsstúlkur skoruðu þrjú síðustu mörkin og unnu sannfærandi.

Margrét Lára Viðarsdóttir skoraði tvö mörk fyrir Val og þá gerðu Dóra María Lárusdóttir og Katrín Jónsdóttir sitthvort markið.

KR vann Þór/KA 3-1 á KR-vellinum. Stjarnan sem er í þriðja sæti vann 3-0 útisigur á Fjölni. Björk Gunnarsdóttir skoraði tvö mörk og Inga Birna Friðjónsdóttir eitt.

Breiðablik vann 2-0 útisigur á Keflavík og þá vann Afturelding 1-0 sigur á Fylki.