Britney Spears leikur lögfræðing

Vinir Britney Spears óttast að hún muni reyna að flytja mál sitt sjálf í forræðisdeilu hennar og Kevins Federline. Söngkonan var eins og frægt er orðið lögð inn á Cedars Sinai sjúkrahúsið eftir að hún neitaði að láta syni sína tvo af hendi til lífvarðar eiginmannsins fyrrverandi skömmu fyrir helgi.

Þegar lögregla kom á staðinn til að sækja börnin hegðaði Britney sér einkennilega og var talin vera undir áhrifum lyfja. Lyfjapróf á spítalanum leiddu svo síðar í ljós að hún var allsgáð, en hún er talin þjást af geðhvarfasýki. Á vefnum doktor.is segir að geðhvöf einkennist af mislöngum tímabilum af þunglyndi og maníu. Sjúklingurinn geti á þessum tímabilum sturlaður, það er að segja með brenglað raunveruleikaskyn.

„Britney á tímabil þar sem hún trúir því að hún geti höndlað allt - krakkana, vinnuna, jafnvel skilnaðinn" hefur slúðurdálkahöfundur MSNBC vefsíðunnar eftir vini söngkonunnar. Sá óttast að Britney muni ákveða að flytja mál sitt sjálf í forræðisdeilunni, eftir að lögfræðingar hennar sögðu upp störfum í síðustu viku. „Hún er komin með nóg af lögfræðingum og trúir því ekki að þeir viti hvað þeir eru að gera. Hún er alvarlega að hugleiða að taka málið yfir sjálf." sagði vinurinn.