Gerðu Ferguson bara reiðan

Sápuóperunni í kring um Cristiano Ronaldo hjá Manchester United er hvergi nærri lokið og nú hefur Roy Keane blandað sér í hana með áhugaverðum ummælum.

Keane var fyrirliði United undir stjórn Alex Ferguson á sínum tíma og Sunderland-stjórinn er með gott ráð handa Ronaldo ef hann vill losna frá félaginu og fara til Real Madrid eins og haldið hefur verið fram.

"Ef leikmaður vill fara frá félagi sínu, þarf hann ekki annað en að mæta á æfingar með skítamóral - það er örugg leið til að gera hvaða stjóra sem er gráhærðann," sagði Keane kuldalega og bætti við að hollusta væri að verða sjaldgæft fyrirbæri í knattspyrnunni.

"Það er ekki mikil hollusta eftir í boltanum og það þekki ég af eigin reynslu. Þegar félag er búið að nota þig - þá bara losar það sig við þig. Ef menn fá tækifæri til að sækjast í eitthvað betra, verða þeir að taka því. Það er mín reynsla. Fólk setur spurningamerki við hollustu leikmanna- ég set spurningamerki við hollustu félaga. Þetta eru bara viðskipti," sagði Keane í samtali við Sun.

"Ef félag telur sig ekki geta notað þig, getur það kastað þér á dyr á 10 mínútum. Ég tala af reynslu. Leikmenn ganga einfaldlega kaupum og sölum eins og kjöt," sagði Írinn grjótharði.