Lífið

Íslensk kona auglýsir erótískt nudd á Google

SB skrifar
Bodynudd.is. Auglýsir erótískt nudd á netinu.
Bodynudd.is. Auglýsir erótískt nudd á netinu.
„Það er ekkert kynlíf í boði," segir íslensk kona sem auglýsir erótískt nudd á leitarvefnum Google. Hún gagnrýnir femínista og fjölmiðla fyrir að gera starfsemi hennar tortryggilega.

Konan vildi ekki koma fram undir nafni. Hún sagðist ekki treysta sér í orrarhríðina sem fylgir því að stíga út úr skápnum með starfsemi sína. Hún segist hafa lært erótískt nudd í Ástralíu og starfað um nokkurt skeið hér á landi.

„Nei, þú færð enga diplómu í svona nuddi. Þetta lærir maður bara af sjálfum sér," segir konan, spurð út í það hvort hún hafi löggilt leyfi sem nuddari.

Á heimasíðunni bodynudd.is getur að líta myndir af fögrum konum í erótískum stellingum. Steggjapartý eru boðin velkomin á nuddstofuna þar sem sagt er boðið upp á sauna og annan munað.

Stofan er þó ekki raunveruleg. Hún er aðeins til á netinu. Í raunveruleikanum stendur konan ein á bak við starfsemina og stundar nudd sitt á gráu svæði laganna í skjóli myrkurs.

„Þetta er ekki skráð eða löglegt. Ég hef gefist upp á því. Þjóðfélagið vill frekar vera með þetta underground heldur en að gefa grænt ljós á svona starfsemi. Til dæmis hringdi Fréttablaðið í mig áðan og blaðakonan sagði síðuna mína klámfengna. Klámfengna! Þetta er náttúrlega erótík og það sjá allir sem vilja sjá."

Konan auglýsir erótíska nuddið á Google og segir þá auglýsingu hafa fengið mikla athygli. „Það er ekkert óeðlilegt við þetta. Eftirspurnin er mikil, bæði frá körlum og konum, og það eru engin lög sem banna manni að auglýsa."

"...og ég held það sé betra að hafa þetta upp á borði í staðinn fyrir að láta Pólverjunum og Litháunum eftir markaðinn," segir nuddkonan dularfulla sem berar sig fyrir framan kúnna en kýs í fjölmiðlum að hylja sig með nafnleynd af ótta við almenningsálitið.



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.