Calderon að gefast upp á Ronaldo

Ramon Calderon, forseti Real Madrid, segist reikna með því að Cristiano Ronaldo verði áfram í herbúðum Manchester United á næsta tímabili.

Ronaldo hefur verið í fréttum á degi hverjum í sumar vegna meints áhuga spænska félagsins á að kaupa hann frá United og Portúgalinn hefur lítið reynt að draga úr slúðrinu - heldur frekar aukið á það með því að segja að "það sé draumur hans að spila fyrir Real Madrid."

Forráðamenn Real Madrid hafa heldur ekki farið leynt með áhuga sinn á Ronaldo, en nú virðist vera kominn uppgjafartónn í forseta félagsins.

"Ronaldo hefur sagt að það sé draumur hans að spila með Real Madrid, en Manchester United á sér enga slíka drauma og við getum ekkert gert á meðan svo er. United verður að vera tilbúið að selja hann. Það er enn tími til að gera eitthvað, en eins og staðan er í dag verður ekkert úr því," sagði Calderon í samtali við Marca.