Wenger: Arsenal verður að selja leikmenn

Arsene Wenger, stjóri Arsenal, segir að félagið gæti þurft að selja sína bestu leikmenn í burtu frá félaginu um ókomin ár til að gæta að rekstrinum. Hann er ósáttur við stöðuna á leikmannamarkaðnum í nútímaknattspyrnu.

Arsenal seldi Thierry Henry fyrir 16 milljónir punda á síðustu leiktíð og fjárfesti hluta af þeim peningum í króatíska framherjann Eduardo.

Ekki þykir ólíklegt að félagið muni hinsvegar selja tvo af sínum bestu mönnum í sumar, þá Alex Hleb og Emmanuel Adebayor.

Wenger segir að Arsenal neyðist til að íhuga vandlega að selja menn í sumar ef góð tilboð koma, því félagið sé skuldsett vegna byggingar Emirates vallarins.

"Stefna okkar er að selja leikmenn á hverju ári og fá ódýrari leikmenn í staðinn. Við þurfum að uppfylla ákveðinn metnað hérna og þar með verðum við að sjá til þess að við getum fjármagnað byggingu vallarins. Við byggjum frekar á ungum leikmönnum en stjörnum," sagði Wenger í samtali við News of the World.

Hann er hinsvegar ósáttur við stöðuna á leikmannamarkaðnum í dag.

"Eg ég gæti gert eitthvað til að breyta leikmannamarkaðnum í dag myndi ég breyta þróuninni sem hefur gert leikmenn að málaliðum. Ef þeir eru lélegir, hanga þeir á samningum sínum - en ef þeir eru góðir - vilja þeir fara annað. Ég hef barist fyrir því að leikmenn mínir fái góða samninga, en ég vil í staðinn að þeir sýni félagi sínu hollustu," sagði Wenger.