Kampavín teygað sem aldrei fyrr

Landsmenn hafa teygað kampavín sem aldrei fyrr í góðæri undanfarinna ára. Kampavínssala jókst um rösklega áttatíu prósent milli áranna 2003 og 2006.

Íslendingum hefur löngum verið legið á hálsi fyrir neyslugleði. En í grein Þóru Helgadóttur hagfræðings í Markaðnum í dag kemur fram að neyslan hér er mun sveiflukenndari en hjá öðrum vestrænum ríkjum. En það þýðir líka að þegar vel árar flykkjumst við í búðir. Og höfum reyndar gert æ oftar því Íslendingar neyta nú um helmingi meira en þeir gerðu fyrir aðeins 10 árum. Bara Írar slá okkur við í neysluaukningunni.

Og síðustu árin hefur mikil bjartsýni einkennt þjóðfélagið - eins og sjá má þegar skoðað er hvað landsmenn hafa bætt við sig af ýmsum lúxusvarningi. Þóra bendir meðal annars á - og hefur upp úr rannsókn hagstofunnar á útgjöldum heimilanna, að:

Árið 2003 - áttu aðeins 5,8% heimila í landinu tjaldvagn. Yfir tvöfalt fleiri áttu tjaldvagn - þremur árum síðar.

Árið 2003 áttu 2,6% heimila vélsleða - næstum eitt af hverjum tuttugu heimilum átti vélsleða árið 2006.

Sjónvarpstæki eru líklega á hverju heimili en á 5% heimila voru fjögur sjónvarpstæki eða fleiri árið 2003. Slík sjónvarpstækjaauðlegð var komin á 8% heimila þremur árum síðar. Og þarfasti þjónninn er auðvitað til á flestum betri heimilum - en árið 2004 var minnst þriggja bíla floti á fjórum komma þremur prósentum heimila - tveimur árum síðar var viðlíka floti á sjö komma þremur prósentum þeirra.

Og svo eru það guðaveigarnar - drykkurinn freyðandi gullni sem mörgum finnst æðstatákn hins ljúfa lífs - kampavínið. Þar höfum við Íslendingar aldeilis tekið okkur á. Árið 2003 sötruðum við tæplega sextán þúsund lítra af kampavíni - þremur árum síðar svolgruðum við í okkur næstum helmingi meira, eða tæplega 29 þúsund lítra.