Færri fengu íslenskt ríkisfang í fyrra en árin á undan

Tæplega 650 manns fengu íslenskt ríkisfang í fyrra sem eru nokkru færri en verið hefur undanfarin þrjú ár. Þetta kemur fram á vef Hagstofunnar.

Fram til 2006 fjölgaði þeim sem veitt var íslenskt ríkisfang jafnt og þétt en mest var fjölgunin á milli áranna 2003 og 2004. Árið 2006 fengu 844 manns íslenskt ríkisfang og var það mesti fjöldi ríkisfangsveitinga fram að því.

Flestir einstaklingar sem hlutu íslenskt ríkisfang árið 2007 höfðu áður ríkisfang í Póllandi, líkt og árin á undan. Fjöldi þeirra var þó minni en 2006, eða 162 árið 2007 á móti 222 árið áður. Næst fjölmennasti hópurinn var áður með ríkisfang á Filippseyjum, eða 69 manns, og 63 höfðu áður ríkisfang í löndum fyrrum Júgóslavíu.