Fyrrverandi yfirmaður MI6 neitar morði Díönu

Fyrrverandi yfirmaður bresku leyniþjónustunnar MI6 hefur neitað því staðfastlega að bera ábyrgð á dauða Díönu prinsessu af Wales. Sir Richard Dearlove var yfirheyrður við réttarrannsóknina sem nú fer fram í London. Vitnisburðurinn þykir sögulegur í ljósi þess að meginregla MI6 er að svara aldrei ásökunum gegn þjónustunni.

Sir Richard vann ýmis störf fyrir MI6, bæði í Bretlandi og í öðrum löndum, frá árunum 1966 þar til hann fór á eftirlaun árið 2004, en þá var hann yfirmaður stofnunarinnar.

Þegar hann var spurður hvort hann hefði einhvern tíman orðið var við að leyniþjónustan stæði á bakvið morð svaraði hann einfaldlegal; „Nei."

Vitnisburður Sir Richard er svar við ásökunum Mohamed Al Fayed, föður Dodi, sem sakar MI6 um að myrða son sinn og prinsessuna.

Sir Richard sagði kviðdómnum að ásakanirnar væru persónulegar þar sem hann hefði verið yfirmaður á þeim tíma sem parið lést. Auk Díönu og Dodi lést ökumaðurinn Henry Paul í slysinu.

Í síðustu viku bar njósnari sem vann hjá MI6 vitni um að hann hefði séð skýrslu um öryggisvörð sem vann á Ritz hótelinu í París. Richard Tomlinson sagði einnig að MI6 hefði verið með áform um að drepa Slobodan Milosevic fyrrverandi forseta Serbíu með því að blinda ökumann hans með sterkum ljósum í göngum.